UN yakosolewa kushindwa kuwalinda raia CAR

Shirika la Msamaha Duniani la Amnesty International limeukosoa Umoja wa Mataifa kwa kushindwa kulinda raia katika Jamhuri ya Afrika ya Kati, huku machafuko yakiendelea nchini humo. Amnesty imesema licha ya kuwepo mpango mpya wa UN katika nchi hiyo, lakini makumi ya raia wakiwemo watoto wameuawa na maelfu ya wengine kuhama makazi yao katika wiki za hivi karibuni. Shirika hilo la kutetea haki za binadamu pia limekitaka kikosi cha kulinda amani cha Umoja wa Mataifa kilichopo Jamhuri ya Afrika ya Kati kuchukua hatua madhubuti za kuwalinda raia katika wimbi jipya la mashambulio yanayowalenga Waislamu nchini humo.

 Ripoti zinasema kuwa zaidi ya watu 5,000 wameuawa katika nchi hiyo ya katikati mwa Afrika tangu Disemba mwaka jana, nchi hiyo ilipotumbukia kwenye machafuko. Machafuko hayo yalianza baada ya genge la Kikristo la Anti Balaka kuanza kuwashambulia Waislamu.