Velayati: Marekani haitasimama kupambana na ugaidi

Mshauri wa Kiongozi Muadhamu wa Mapinduzi ya Kiislamu katika masuala ya kimataifa amezikosoa vikali siasa za kindumakuwili za Marekani na kubainisha kwamba, Washington haitasimama na kupambana na ugaidi. Dakta Ali Akbar Velayati amesema bayana kwamba, nchi kama Marekani ambazo zimetanguliza mbele siasa za kindumakuwili katika Mashariki ya Kati, bila shaka haziwezi kuja na kuanza kupambana na ugaidi.
Dakta Velayati ambaye pia ni Mkuu wa Taasisi ya Utafiti wa Kiisratijia ya Halmashauri ya Kuainisha Maslahi ya Mfumo wa Jamhuri ya Kiislamu ya Iran amesema hayo alipokutana hapa mjini Tehran na Ujumbe wa Taasisi ya Utafiti wa Kielimu kutoka Sweden na kueleza masikitiko yake kutokana na uingiliaji kati wa madola ya kigeni katika masuala ya eneo hili la Mashariki ya Kati.
Amesema, madola yanayofanya uingiliaji katika masuala ya Mashariki ya Kati yanalipeleka eneo hili upande wa kuangamia. Mshauri wa Kiongozi Muadhamu wa Mapinduzi ya Kiislamu amesema kwamba, madola kama Marekani na waitifaki wake ambao wanapigia upatu suala la kupambana na ugaidi na wakati huohuo kuendesha siasa za kindumakuwili katu hayawezi kuwa na nia ya kweli na ya dhati katika kupambana na ugaidi.