Mashabane:Kadhia ya Palestina itatuliwe haraka

Waziri wa Mashauri ya Kigeni wa Afrika Kusini amesema kuwa, kupatiwa ufumbuzi mgogoro wa Palestina ni jukumu la kimataifa. Maite Nkoana-Mashabane amesema hayo katika hotuba yake kwenye mkutano wa kukarabati Gaza, huko Cairo Misri na kusisitiza kwamba, kumefanyika makongamano na mikutano mingi kuhusiana na kadhia ya Palestina, lakini pamoja na hayo Wapalestina wangali wanataabika na kuteseka kutokana na kuishi katika mazingira magumu mno.
Waziri wa Mashauri ya Kigeni wa Afrika Kusini amesisitiza kwamba, Wapalestina wanaitaka jamii ya kimataifa iandae mazingira ya kubo reshwa miundo mbinu. Amesema, ni makumi ya miaka sasa ambapo Wapalestina wamekuwa wakiendesha mapambano ya kukomboa ardhi zao na kuongeza kuwa, serikali ya Afrika Kusini itaendelea kuliunga mkono taifa madhulumu la Palestina mpaka litakapofanikiwa kufikia malengo yake. Bi Mashambane amesisitiza kuwa, serikali ya Afrika Kusini inasisitiza juu ya kusitishwa mashambulio ya utawala wa Kizayuni wa Israel dhidi ya Wapalestina.