Mwanaharakati wa haki za binadamu akamatwa Bahrain

Polisi ya Bahrain imemtia mbaroni mwanaharakati maarufu wa haki za binadamu Nabeel Rajab kutokana na kuandika katika mtandao wa Twitter matamshi ya kupinga serikali, huku utawala wa Manama ukiendelea kuwakandamiza waandamanaji. Taarifa iliyotolewa na serikali imeeleza kuwa, baada ya polisi kumhoji mwanaharakati huyo ambaye ni mkurugenzi wa Kituo cha Haki za Binadamu cha Bahrain (BCHR), hatua zimechukuliwa za kumfikisha mahakamani.
Katika moja ya matamshi yake kwenye mtandao wa Twittr Nabeel Rajab alisema kuwa, Wabahraini waliojiunga na kundi la Daesh nchini Syria na Iraq kiuhakika wanatoka katika taasisi za usalama za utawala wa kifalme wa Manama.
Makundi ya haki za binadamu yamelaani kukamatwa mwanaharakati huyo na kuutaka utawala wa kifalme wa al Khalifa uache kuwanyanyasa watetezi wa haki za binadamu.