Mjumbe UN asisitiza suala la kulindwa raia S/Kusini

Mwakilishi mpya wa Umoja wa Mataifa nchini Sudan Kusini ametaka zifanyike juhudi kubwa za kulindwa usalama wa raia wa nchi hiyo. Ellen Margrethe Loej ambaye ameteuliwa hivi karibuni kuwa mjumbe mpya wa Ban Ki moon Katibu Mkuu wa Umoja wa Mataifa nchini Sudan Kusini amesema kwamba, atalipa kipaumbele suala la kulindwa usalama wa raia, na kusisitiza kwamba Sudan Kusini linakabiliwa na changamoto nyingi likiwemo suala la wimbi la wakimbizi. Mwakilishi wa Katibu Mkuu wa Umoja wa Mataifa nchini Sudan Kusini ameongeza kuwa, kuna ulazima wa kutumiwa suhula zaidi kwa lengo la kudhaminiwa mahitajio ya watu wanaohitajia misaada ya kibinadamu. Ellen Loej amesisitiza kwamba watu waliotenda jinai za kivita au zilizo dhidi ya binadamu wanapaswa kuchukuliwa hatua za kisheria. Inafaa kuashiria hapa kuwa, machafuko nchini Sudan Kusini yalianza mwezi Disemba mwaka jana, na hadi sasa viongozi wa serikali ya Juba na waasi wanaoongozwa na Riek Machar makamu wa zamani wa rais wameshatiliana saini makubaliano ya amani mara nne, lakini makubaliano hayo yamekuwa yakikiukwa na pande hizo mbili. Shirika la Mpango wa Chakula Duniani WFP limetangaza kuwa, watu zaidi ya milioni moja na nusu wa nchi hiyo wamelazimika kuwa wakimbizi ndani na nje ya nchi hiyo.