Jeshi Syria lakomboa mji mwengine wa kistratijia

Katika mfululizo wa operesheni zinazotekelezwa na jeshi la Syria za kuyakomboa maeneo yanayodhibitiwa na makundi ya kigaidi, jeshi hilo limefanikiwa kuukomboa mji wa kistratijia wa Ladhiqiyyah ulioko magharibi mwa nchi hiyo. Jeshi la Syria limeidhibiti kikamilifu miji ya Ainul-Jauzah, Ruwaisatul-Jaurah na miinuko ya kistratrijia ya mji huo wa Ladhiqiyyah sanjari na kuwaangamiza makumi ya magaidi wengi wao wakiwa na uraia wa kigeni. Aidha jeshi hilo limezidi kusonga mbele katika miji kadhaa ya Hama ambapo linatumia vifaru na silaha nyingine nzito na kuteketeza ngome za kuhifadhia silaha za makundi hayo. Aidha jeshi la Syria limeendelea na operesheni zake dhidi ya magenge hayo ya kigaidi katika mkoa wa Rif Dimashq. Hayo yanajiri katika hali ambayo John Allen, afisa wa jeshi la Marekani katika Shirika la Kijeshi la NATO, amesema kuwa nchi yake imeanza shughuli za kuyapa mafunzo makundi aliyoyaita kuwa ni ‘wapinzani wa serikali wenye siasa za wastani’ na kusisitiza kuwa, shughuli hizo zitaendelea kwa muda mrefu. Kwa mujibu wa afisa huyo wa kijeshi wa Marekani, shughuli hizo zitadumu kwa miaka kadhaa