Mazungumzo ya kitaifa Sudan yaungwa mkono

Mwakilishi maalumu wa Jumuiya ya Nchi za Kiarabu nchini Sudan amesema kuwa, taasisi hiyo inaunga mkono mazungumzo ya kitaifa nchini humo. Swalah Halima pia ameyataka makundi yenye kubeba silaha na vyama vya upinzani kujiunga na mazungumzo hayo na serikali, ili kutatua matataizo ya kisiasa ya nchi hiyo. Aidha amesifu mpango huo wa mazungumo ya kitaifa uliobuniwa na Rais Omar al Bashir na kusema kwamba, maafisa wa Khartoum wamepiga hatua chanya kwa ajili ya kuandaa mazingira ya mazungumzo.
 Hayo yanajiri huku ikiripotiwa kuwa idadi kubwa ya waasi wa magharibi mwa Sudan wanatarajiwa kutia saini makubaliano ya amani na serikali. Jaafar Abdulhakim kamanda wa jimbo la Darfur amesema kuwa, idadi kubwa ya wanamgambo wa kundi la waasi wa Harakati ya Ukombozi wa Sudan wamejitenga na kundi hilo na kwamba hivi karibuni watatia saini makubaliano ya amani na serikali ya Khartoum.