Rais wa CAR akutana na viongozi wa Anti Balaka

Rais wa Serikali ya Mpito ya Jamhuri ya Afrika ya Kati amekutana na kufanya mazungumzo na viongozi wa kundi la wanamgambo wa Kikristo la Anti Balaka la nchini humo.
Taarifa kutoka Bangui zinasema kuwa, Rais Catherine Samba – Panza jana alikutana na viongozi wa kundi la Anti Balaka na kulitaka kundi hilo kuacha mara moja kukariri madai yao ya kumtaka ajiuzulu. Rais Samba – Panza ameongeza kuwa katika siku chache zijazo wananchi wa nchi hiyo watashuhudia amani na utulivu ikirejeshwa nchini humo.
Inafaa kuashiria hapa kuwa, siku chache zilizopita, mji mkuu wa nchi hiyo Bangui ulishuhudia mapigano yaliyosababisha watu wawili kuuawa raia wa Burundi na Cameroon na kusababisha askari sita wa kulinda amani wa Umoja wa Mataifa kujeruhiwa kwenye mapigano hayo.
Wiki iliyopita, Patrice Edouard Ngaissona Mratibu wa kitaifa wa kundi la Kikristo la Anti Balaka alimtaka Rais Samba - Panza ajiuzulu kwa madai kwamba ameshindwa kutekeleza ipasavyo majukumu yake.