Iraq yakataa ushiriki wa Waarabu dhidi ya Daesh

Haydar al Abadi, Waziri Mkuu wa Iraq amepinga vikali ushiriki wa nchi za Kiarabu kwenye mashambulio ya anga ya Marekani dhidi ya ngome za matakfiri wa Daesh nchini humo. Matamshi ya Waziri Mkuu wa Iraq yanatolewa katika hali ambayo, nchi za Saudi Arabia, Jordan, Bahrain, Qatar na Umoja wa Falme za Kiarabu zinashirikiana na Marekani kwenye mashambulio ya anga dhidi ya wanamgambo wa Daesh nchini Syria. Haydar al Abadi amesisitiza kuwa, hakuna mwanajeshi yoyote wa kigeni atakayeruhusiwa kuingia ndani ya ardhi ya Iraq kwa shabaha ya kupambana na magaidi wa Daesh.
Waziri Mkuu wa Iraq ameongeza kuwa, migongano ya kimataifa na kieneo imesababisha kuibuka kundi la Daesh katika eneo la Mashariki ya Kati. Inafaa kuashiria hapa kuwa, kundi la kigaidi la Daesh lililoanzishwa na kupata msaada mkubwa wa silaha na kifedha kutoka nchi za Magharibi na za Kiarabu za eneo la Mashariki ya Kati linadhibiti sehemu kubwa ya ardhi za Syria na Iraq, na limetekeleza jinai mbalimbali ikiwa ni pamoja na kuwaua kwa umati wananchi wa nchi hizo mbili.