Nigeria kuendeleza mashambulio dhidi ya Boko Haram

Rais Goodluck Jonathan wa Nigeria amesisitiza azma ya serikali ya Abuja ya kukabiliana na kundi la Boko Haram la nchini humo. Akizungumza kwenye sherehe za kutimia miaka 54 ya uhuru wa Nigeria, Rais Jonathan ameongeza kuwa, suala la kulindwa maisha ya wananchi ni miongoni mwa mambo yanayopewa kipaumbele na serikali yake.
Rais Jonathan amesisitiza kwamba kundi la Boko Haram linapasa kupokonywa silaha. Inafaa kuashiria hapa kuwa, tangu mwaka 2009 kundi la Boko Haram limekuwa likitekeleza mauaji, utekaji nyara, uripuaji wa majengo ya serikali na kuharibu miundombinu nchini humo na kusababisha zaidi ya watu 2,000 kuuawa na mamia ya maelfu ya wengine kuwa wakimbizi.