Jumapili, 28 Septemba 2014 20:07 Wazayuni wawateka nyara vijana saba wa Kipalestina

Askari wa Israel wamevamia nyumba kadhaa za Wapalestina katika Ukingo wa Magharibi wa Mto Jordan unaokaliwa kwa mabavu na kuwateka nyara vijana wasiopungua saba wa Kipalestina. Vijana hao wa Kipalestina wametekwa nyara baada ya wanajeshi wa Israel kuvamia nyumba zao katika miji ya Baytullahm, Quds, Husan na al Khalil mapema leo Jumapili. Wakazi wa maeneo hayo wamesema kuwa, vijana hao wamepelekwa kusikojulikana. Watano kati ya vijana hao wanadaiwa kuwalenga mawe wanajeshi wa utawala wa Kizayuni. Shirika la haki za binadamu la Palestina limesema kuwa, hivi sasa utawala wa Kizayuni unawashikilia Wapalestina 540 bila ya kuwafikisha mahakamani na kwamba kasi ya kutekwa nyara Wapalestina imeongezeka sana katika miaka ya hivi karibuni. Wazayuni wanaendelea kuwanyanyasa na kuwateka nyara kiholela Wapalestina huku hivi karibuni yaani tarehe 7 Julai utawala huo ukiwa umefanya mashambulizi ya kikatili dhidi ya Ukanda wa Ghaza na kuua mamia kwa mamia ya watu wasio na hatia kwa madai yasiyothibitishwa kuwa vijana watatu wa Kizayuni walitekwa nyara katika Ukingo wa Magharibi wa Mto Jordan.